François Villon

BALLADES

1.
Ballade des menus propos

Je cognois bien mouches en let,
Je cognois a la robr l'homme,
Je cognois la beau temps du let,
Je cognois au pommier la pomme,
Je cognois l'arbre a veoir la gomme,
Je cognois quant tout est de mesmes,
Je cognois qui besogne ou chomme,
Je cognois tout, fors que moy mesmes.

Je cognois puorpoint au colet,
Je cognois le moyne a la gonne,
Je cognois le maistre au varlet,
Je cognois au voille la nonne,
Je cognois quant pipeur jargonne,
Je cognois fols nourris de cresmes,
Je cognois le vin a la tonne,
Je cognois tout, fors que moy mesmes.

Je cognois cheval et mulet,
Je cognois leur charge et leur somme,
Je cognois Bietris et Belet,
Je cognois get qui nombre et somme,
Je cognois vision et somme,
Je cognois la faulte des Boesmes,
Je cognois le povoir de Romme,
Je cognois tout, fors que moy mesmes.

Prince, je congnois tout en somme,
Je cognois coulourez et blesmes,
Je cognois Mort qui tout consomme,
Je cognois tout, fors que moy mesmes.

2.
Ballade des contre verites

Il n'est que quand on a fain,
Ne service que d'ennemy,
Ne maschier qu'ung botel de foing,
Ne fort guet que d'homme endormy,
Ne clemence que felonnie,
N'asseurence que de peureux,
Ne foy que d'homme qui regnie,
Ne bien consellé qu'amoureux.

Il n'est engendrement qu'en boing,
Ne bon bruit que d'homme banny,
Ne ris qu'après ung coup de poing,
Ne lotz que debtes mettre en ny,
Ne vraye amour qu'en flaterie,
N'encontre que de maleureux,
Ne vrayrapport que menterie,
Ne bien conseillé qu'amoureux.

Ne tel repos que vivre en soing,
N'honneur porter que dire: "Fi!",
Ne soy vanter que de faulx coing,
Ne santé que d'homme bouffy,
Ne hault vouloir que couardie,
Ne conseil que de furieux,
Ne doulceur qu'en femme estourdie,
Ne bien consillé qu'amoureux.

Voulez vous que verté vous die?
Il n'est jouer qu'en maladie,
Lettre vraye que tragedie,
Lasche homme que chevalereux,
Orrible son que melodie,
Ne bien consellé qu'amoureux.

Copyright © 1997-2002 by KORE Multimedia